Аж үйлдвэр, эрдэс баялгийн дэд сайд Б.Энхтүвшин шатахууны үнэ, нийлүүлэлтийн талаар өнөөдөр (2026.03.27) мэдээлэл өглөө.
Тэрбээр хэлэхдээ, "Гуравдугаар сард 181 мянган тонн нефтийн бүтээгдэхүүн захиалсан. Энэ сарын 26-ны өдрийн байдлаар АИ-92 90.1 мянган тонн буюу 42 хоног, АИ-95 6.4 мянган тонн буюу 72 хоног, дизелийн түлш 115 мянган тонн буюу 29 хоног, ТС (онгоцны түлш) 3.9 мянган тонн буюу 19 хоногийн ердийн хэрэглээний нөөц, үлдэгдэлтэй байна.
Өчигдөр ОХУ-аас нефть бүтээгдэхүүний тонн тутмын хил үнийг ирүүлсэн. Үүнд:
Энгийн АИ-92 тогтворжуулсан үнээр буюу 705 ам.доллар,
Евро-5 1206 ам.доллар,
АИ-95 1176 ам.доллар,
АИ-98 1226 ам.доллар,
Энгийн дизелийн түлш1385 ам.доллар,
Евро дизелийн түлш 1410 ам.доллар тус тус байхаар ирүүлээд байна.
Газрын тосны бүтээгдэхүүний хангамж, үнийг тогтворжуулах ажлыг зохион байгуулах, үүрэг тавих, төр, хувийн хэвшлийн үнийн зөвлөл өчигдөр хуралдаж АИ-92-оос бусад бүтээгдэхүүн 300-350 төгрөгөөр нэмэх зөвлөмжийг өгсөн. Хил үнийг тооцож үзэхэд 900-2000 төгрөгөөр нэмэгдэх тооцоолол гарсан.
Гуравдугаар сард дизель түлшинд 54 ам.доллар, авто бензин 30 ам.долларын үнэ нэмэгдэж ирсэн. Бид нөөц бүрдүүлсэн учраас үнэ нэмэхгүй байх зөвлөмжийг өгч байсан. Одоо дэлхийн нөхцөл байдлаас үүдэн тодорхой хэмжээнд үнийг үе шаттай нэмэгдүүлэхээс аргагүй байдалд хүрч байна.
Сүүлийн 7 хоногт брент маркийн газрын тосны үнэ 100-118 ам.долларт хэлбэлзэж байна.
