Г.БААТАР2023 он дуустал Хятад улс нүүрсний импортын 0 татварыг хэвээр байхаар тогтжээ. Тус улсын Засгийн газраас өнгөрсөн оны тавдугаар сарын 1-нээс энэ оны гуравдугаар сарын 31-ний өдрийг хүртэл нүүрсний импортын 3-6 хувийн татварыг тэглэсэн билээ. Энэхүү шийдвэр нь дэлхийн зах зээл дээрх нүүрсний үнээс үүдэлтэй дотоодын хэрэглэгчдийн зардлыг бууруулах, нүүрсний импортыг нэмэгдүүлэхэд чиглэсэн юм.
Хятадын татварын бодлого хариуцсан төрийн зөвлөлийн комиссын (2023.03.25) мэдэгдсэнээр дотоодын нүүрсний найдвартай нийлүүлэлтийг хангах зорилтоор нүүрсний импортын 0 татварыг дөрөвдүгээр сарын 1-нээс үргэлжлүүлэн арванхоёрдугаар сарыг дуустал мөрдөхөөр болжээ.
Томоохон нийлүүлэгч орнуудаас Австрали, Индонез улс хэдийн импортын татваргүйгээр нүүрсээ Хятадын зах зээлд нийлүүлж буй бөгөөд Хятадтай тусдаа байгуулсан худалдааны хэлэлцээрийн хүрээнд үйлчилж байгаа аж.
Хятадын 0 татварын бодлого нь тус улсын импортын нүүрсний үнэ буурахад нөлөөлнө гэж MinSheng Securities-ийн шинжээчид үзэж байна.
Энэ оны эхний хоёр сарын байдлаар Хятадын нүүрсний импорт өнгөрсөн оны мөн үеийнхээс 71 хувиар өсжээ. Тус улс Индонезоос хямд үнээр эрчим хүчний нүүрсний худалдан авалтыг нэмэгдүүлж, мөн КОВИД-19-ийн хязгаарлалтыг хөнгөвчилсний дараа Монгол Улсаас ч нүүрсний нийлүүлэлт нэмэгдэж байна.
