Баасан гаригт (2025.03.14) алтны үнэ анх удаа 3004.71 ам.доллароор арилжаалагджээ. Энэ нь алтны түүхэн дээд үзүүлэлтэд тооцогдож байгаа юм. АНУ-ын Ерөнхийлөгч Д.Трампын татварын шинэ бодлогоос үүдэн эдийн засгийн тодорхойгүй байдлаас сэргийлж хөрөнгө оруулагчид шар металлыг нөөцөлж байна
Алтны үнэ 2008 онд олон улсын санхүүгийн хямралаар 1000 ам.доллар, КОВИД-19-ийн үед 2000 ам.долларыг давсан бол одоо худалдааны дайны өрнөлөөр 3000 ам.долларт хүрлээ.
Өнгөрсөн 25 жилийн хугацаанд шар металлын ханш арав дахин өсч, мөн хугацаанд дөрөв дахин өссөн S&P 500-аас ч илүү гарч байна.
Алтны ханш 3000 ам.доллар хүрсэн өсөлт нь томоохон шинжээчдийн таамаглаж байснаас ч хурдан тохиов.
First Eagle Investment Management-ийн шинжээч Томас Керцос “Алт бол бидний харж байсан макро эдийн засгийн өргөн хүрээний цочролоор үнэ цэнээ хадгалах чадвартай хөрөнгө" гэж онцолжээ. Энэ долоо хоногийн эхээр Bank of America шинжээчд "Алтны үнийг 3500 ам.долларт хүргэхийн тулд хөрөнгө оруулалтын эрэлт 10 хувиар өсөх шаардлагатай" гэж мэдэгджээ. Өмнө нь Goldman Sachs алтны үнийг 2025 оны эцэс гэхэд 3100 ам.доллар хүрнэ гэж таамагласан. АНУ-ын шинэ Ерөнхийлөгчийн Засаг захиргааны түрэмгий байр суурь татварын бодлого, урьдчилан таамаглах боломжгүй байдал нь энэ жил алтны ханшийн хамгийн том хөдөлгөгч хүч болж байгааг шинжээчид тайлбарлаж байна. Тэд, Д.Трампын засаг захиргааны бодлогоос үүдэлтэй геополитикийн тогтворгүй байдал олон улсын эдийн засагт дарамт үзүүлсээр байгааг онцолсон.
Red Cloud Securities-ийн шинжээчид "Татварын тодорхойгүй байдал нэмэгдэж, Холбооны Нөөц мөнгөний бодлогоо зөөлрүүлсний улмаас алтны үнэ дээд цэгтээ хүрсэн" гэж тэмдэглэжээ.
2025 он гарснаас хойш шар металлын үнэ 14 хувиар өсөөд байна.
Дэлхийн алтны зөвлөлийн мэдээлснээр, 2022 онд Орос, Украины дайн дэгдсэнээс хойш төв банкуудын алтны худалдан авалт жилд 1000 гаруй тонн болж хоёр дахин нэмэгджээ. Тэр дунд эдийн засгийн хамгийн том өрсөлдөгч гэж АНУ-ын үздэг Хятад байгаа. Тус улс саяхан өндөр үнээр худалдан авалтаа сэргээж, алтны нөөцөө дөрвөн сар дараалан нэмэгдүүлжээ.
