Аж үйлдвэр, эрдэс баялгийн яам, БНСУ-ын Засгийн газрын хөгжлийн албан ёсны тусламж (ODA)-ийн санхүүжилтээр, БНСУ-ын Худалдаа, аж үйлдвэр, эрчим хүчний яам (MOTIE) ховор металлд нэмүү өртөг шингээх, эргэлтэд оруулах чиглэлээр хамтран ажиллаж байна. Энэ хүрээнд "Монгол-Солонгосын хамтарсан ховор металлын судалгааны төв" байгуулах хамтын ажиллагааны II хурал Сөүл хотод (2025.03.12-16) боллоо.
Хамтарсан хорооны хурлыг Монгол Улсын АҮЭБЯ-ны Төрийн нарийн бичгийн дарга С.Жавхланбаатар, БНСУ-ын Худалдаа, аж үйлдвэр, эрчим хүчний дэд сайд Lee Hohyeon нар даргалав.
Хамтарсан хорооны хурлаар “Монгол-Солонгосын хамтарсан ховор металлын судалгааны төв” байгуулах төслийн ажлын явц, “Геологийн судалгаа-шинжилгээний төв” ТӨҮГ, Солонгосын КИГАМ байгууллагын хамтран хэрэгжүүлж байгаа геологийн судалгааны ажлын өнөөгийн нөхцөл, ололт амжилт болон бусад асуудлын талаар харилцан мэдээлэл хийсэн байна.
Аж үйлдвэр, эрдэс баялгийн яамны Төрийн нарийн бичгийн дарга С.Жавхланбаатар “Монгол-Солонгосын хамтарсан ховор металлын судалгааны төв” байгуулах төсөл нь Монгол Улсын Засгийн газрын зүгээс баримталж буй уул уурхайн олборлолтоос нэмүү өртөг шингээсэн бүтээгдэхүүн үйлдвэрлэж, дэлхийн зах зээлд нийлүүлэх бодлогод нийцэж байгааг тэмдэглэж, үр дүнтэй хэрэгжилтийг хангахыг цохон тэмдэглэсэн байна.
