Европ тивийн чухал ашигт малтмалын сэдвийн хөнддөг “Raw Materials” олон улсын дээд хэмжээний чуулганы 7 дахь удаагийн арга хэмжээ тавдугаар сарын 13-15-ний өдрүүдэд Брюссель хотноо зохион байгуулагдах гэж байна.
Энэ жилийн чуулган “2030 он хүртэлх уралдаан” уриа дор болж, Европын тогтвортой байдал, өрсөлдөх чадварыг хангахын тулд түүхий эдийн нийлүүлэлтийн сүлжээг баталгаажуулах, аж үйлдвэрийн инновацыг хурдасгах, эдийн засгийн шинэ нөхцөл байдлыг хэлэлцэнэ.
Европын орнуудын бодлого боловсруулагчид, олон улсын хөрөнгө оруулагчид, чухал ашигт малтмалын салбарын нийт 1000 гаруй төлөөлөгчид чуулна.
Гол сэдэв:
🔹 Чухал түүхий эдийн тухай хууль – Нэг жилийн дараа
🔹 Аж үйлдвэрийн шинэчлэл, манлайллыг өргөжүүлэх
🔹Гарааны бизнес болон төслүүдийн хөрөнгө оруулалтыг нээх
🔹 2030 он гэхэд 1.2 сая чадварлаг мэргэжилтэн бэлтгэнэ
Европын Холбооны хувьд 2025 оны гуравдугаар сард эрчим хүчний шилжилт, аюулгүй байдалд чухал гэж үзсэн 17 төрлийн ашигт малтмалаас 14-ийг дотооддоо олборлох, боловсруулах, дахин боловсруулах стратегийн 47 төслийн жагсаалт гаргаад буй онцлогтой. Эдгээр төсөл нь Европын Холбооны жилийн хэрэглээний 10 хувийг олборлож, 40 хувийг боловсруулж, 25 хувийг дахин боловсруулна гэж тооцоолж байгаа юм.
2024 оны чуулган Европын Холбооны Критикал түүхий эдийн хууль батлагдсаны дараа болсноороо онцлог байлаа. Хэлэлцүүлэгт оролцогчид "Уур амьсгалын өөрчлөлтийн эсрэг зорилгодоо хүрэхийн тулд Европт уул уурхайг өргөжүүлэх шаардлагатай. Иймээс шинэ төслүүдийг олон нийтэд хүлээн зөвшөөрүүлэхэд Европын Холбооноос авах арга хэмжээнээс ихээхэн шалтгаална" гэдэг дээр санал нэгдсэн билээ.
Европын аж үйлдвэрийн чухал түүхий эдийн ханган нийлүүлэлтийн сүлжээнд инновац нэвтрүүлэх, нэн ач холбогдолтой ашигт малтмал олборлон боловсруулах, дэвшилтэт материалын үйлдвэрлэлийг нэмэгдүүлэхэд чиглэсэн олон улсын энэхүү чуулган нь EIT RawMaterials-ийн гол арга хэмжээ юм. Дээд хэмжээний чуулганаар Европын түүхий эдийн үйлдвэрлэл, Европын Комисс, Европын Холбооны Парламент, НҮБ-ын Эдийн засгийн комиссыг нэгтгэдэг. Европын Комиссын шийдвэрээр EIT RawMaterials нь Европын түүхий эдийн холбоог (ERMA) удирдаж байна. Европын Холбооны тогтвортой, ногоон эдийн засгийн шилжилтийг дэмжих зорилгоор арван жилийн өмнө EIT RawMaterials байгуулагдсан.
Майнинг Инсайт сэтгүүл нь Европын Холбооны EIT RawMaterials-тай хэвлэл мэдээллийн түншлэлийн гэрээ (2023.03.28) байгуулсан бөгөөд дээд хэмжээний чуулганы мэдээллийн түншээр гурав дахь жилдээ ажиллаж байна. Энэхүү хамтын ажиллагааны хүрээнд тус чуулганд хөнгөлөлттэй үнээр оролцох боломжтой тул манай сэтгүүлийн редакцийн 7710 4334 утсаар бидэнтэй холбогдоно уу.
