"Эрдэнэс Тавантолгой" ХК-ийн Засгийн газрын Онцгой бүрэн эрхт төлөөлөгчдийн багийн Б.Анар, Х.Итгэлт болон компанийн зарим удирдлагууд Хятадын нүүрсний зах зээлийн гол платформ болох Sxcoal-ийн төлөөлөлтэй уулзсан байна. Хөх хотод болсон тус уулзалтаар экспортыг нэмэгдүүлэх, тээвэр, хүргэж өгөх нөхцөлтэй холбоотой авч хэрэгжүүлж буй ажлын тухай мэдээллийг өгсөн аж.
Нүүрсний борлуулалт, тээврийн үйл ажиллагааг сайжруулах шат дараалсан арга хэмжээг авч хэрэгжүүлсний үр дүнд экспорт нэмэгдсэн, тээврийн хүргэж өгөх хугацаа хэд дахин багассан ч зах зээлд оролцогчдод мэдээлэл дутмаг хүрч байгааг онцолжээ.
Мөн “Эрдэнэс Тавантолгой” ХК дуудлага худалдаа зарласны дараа зах зээлд нүүрсний үнэ унахад компани арилжаа хийхийн өмнө дуудлага худалдааны үнээ бууруулдаг ч худалдан авагч талд мэдээлэл шуурхай хүрч чадахгүй байна. Эдгээр асуудлыг шийдвэрлэх компанийн зах зээлд зарлагдаж буй үнийн мэдээллийг хэрэглэгчдэд шуурхай хүргэх, тээвэр болон биржийн арилжааны нөхцөлд гарч буй өөрчлөлт зэргийг тогтмол Sxcoal-ийн хэрэглэгчдэд цаг алдалгүй хүргэх асуудлаар урт хугацаанд хамтран ажиллах хүсэлтэй байгааг компанийн зүгээс илэрхийлжээ.
Sxcoal-ийн хувьд зах зээлийн дүн шинжилгээнд үндэслэн хэрэглэгчдэд хамгийн боломжит хувилбарыг санал болгодог. Хятадын эцсийн хэрэглэгчдэд нийлүүлж байгаа Монголын нүүрсийг Хятадын нүүрстэй холиод хольсон нүүрс ямар чанартай байхаас шалтгаалж ямар хэрэглэгчид хүргэх вэ гэдэг үйлчилгээ эхлүүлж байгаа. Зах зээлд хүлээлт үүсгэж буй хольсон нүүрс гаргах үйлчилгээнд хамтран ажиллах бүрэн боломжтой гэсэн байна.
Энэхүү уулзалтаар хоёр тал урт хугацаанд хамтран ажиллах талаар санал нэгдсэн байна.
Эх сурвалж: ЭТТ
