-Эрчим хүчний салбар анхаарлын төвд-
Хөдөлмөрийн аюулгүй байдал, эрүүл ахуйн (ХАБЭА) аян өнөөдөр (2025.04.02) албан ёсоор эхэллээ. Энэхүү аян ажлын байрны аюулгүй байдлыг хангах, эрүүл орчныг бүрдүүлэх, хууль, дүрэм журмын хэрэгжилтийг сайжруулах зорилготой. Энэ жилийн аян “Хөдөлмөрийн аюулгүй байдал, эрүүл мэндийн хөгжил: Хиймэл оюуны хэрэглээ ба цахимжилт” уриан дор өрнөх юм.
Аяны нээлтийн үеэр Хөдөлмөрийн аюулгүй байдал, эрүүл мэндийн тогтолцооны шинэчлэл, цахим шилжилтийн стратеги, хууль эрх зүйн шинэчлэл зэрэг сэдвүүдийг хэлэлцэж, МАК компанийн амжилттай хэрэгжүүлсэн туршлагуудыг танилцууллаа.
Манай улсад 2024 онд 809 хүн үйлдвэрлэлийн осолд өртсөн нь өмнөх оноос хоёр дахин нэмэгдсэн үзүүлэлт юм. Уул уурхайн салбарт үйлдвэрлэлийн осол, мэргэжлээс шалтгаалсан өвчин их байгаа бол, барилгын салбарт амь нас эрсдэх тохиолдол өндөр байна. Энэхүү өсөлтөд осол, өвчлөлийн бүртгэл сайжирсан нь нөлөөлсөн гэж мэргэжилтнүүд үзэж байна.
Аяны эхний улиралд эрчим хүчний салбарын ХАБЭА-г идэвхжүүлэх ажил өрнөх бөгөөд дөрөвдүгээр сарын 4-нд тус салбарын чуулган зохион байгуулагдана. Харин дараагийн улирлуудад уул уурхай, барилга, зам тээврийн салбарын эрсдэлийг бууруулах чиглэлээр төлөвлөгөөт ажлууд хийгдэх юм.
Ажлын байрны аюулгүй байдлыг сайжруулахын тулд дараах чухал шинэчлэлүүд хийгдэж байна:
• Хууль, эрх зүйн орчныг шинэчлэх
• Цахим шилжилтийг хэрэгжүүлэх
• ХАБЭА-н дэд бүтцийг хөгжүүлэх
• Судалгаа, статистикийн хөгжлийг дэмжих
• Мэргэжлийн хүний нөөцийг бэхжүүлэх
• Хяналт, шалгалтыг чангатгах
Энэ аяны үр дүнд ажилтан бүр эрүүл, аюулгүй орчинд хөдөлмөрлөх нөхцөл бүрдэхийг зорьж байна.
