Аж үйлдвэр, эрдэс баялгийн яамны Төрийн нарийн бичгийн дарга Б.Дашпүрэв өнөөдөр (2026.09.25) автобензиний нийлүүлэлт, нөөцийн талаар мэдээлэл өглөө.
Түүний мэдээлснээр, Улаанбаатар төмөр замын хэмжээнд 162 вагон цистерн буюу 9720 тонн АИ-92 автобензин байна. Үүнээс 132 вагон цистерн буулгахад бэлэн байгаа аж.
ОХУ-аас есдүгээр сард авахаар төлөвлөсөн автобензинээс 18 мянган тонн нь нийлүүлэгдээгүй байна. Мөн БНХАУ-аас есдүгээр сард 8 мянган тонн автобензин авахаар захиалга хийжээ. Тус захиалга Зам-Үүд өртөөнд шингэн түлш ачих байгууламж руу шилжүүлэн ачилт хийгдэж байна.
ОХУ-аас хийх ачилт буурснаар автобензиний нөөц багассан ч сүүлийн хугацаанд нөөц 8 хоногоос 11 хоног болж нэмэгдсэн. Монгол Улсын талаас ОХУ-д ачилтаа нэмэгдүүлэх хүсэлт тавьсны дагуу 59 болон 64 вагон цистерн автобензиний ачилт хийгдсэн байна.
Цаашид автобензиний түгээлтийг хэвийн үргэлжлүүлэхээр ажиллаж байгааг Б.Дашпүрэв мэдээллээ.
