Биржээр 14 сая тонн уул уурхайн бүтээгдэхүүн арилжлаа

БИРЖИЙН АРИЛЖААНЫ ЭХНИЙ ТАВАН САРЫН ТОЙМ

(2024.01.05-05.31)

Э.МИШЭЭЛ

2024 оны эхний таван сард Монголын хөрөнгийн биржээр 1.7 тэрбум ам.долларын, 14 сая тонн уул уурхайн бүтээгдэхүүн арилжлаа. Нийт 397 арилжааны хуваарь зарласнаас 70 хувь нь амжилттай боллоо. Биржээр нүүрс, төмөр, зэсийн 12 төрлийн бүтээгдэхүүн арилжаалж байна. Уул уурхайн бүтээгдэхүүний биржийн арилжааны мэдээллээс багцлан хүргэе.  

Өнгөрсөн онтой харьцуулахад арилжаанд оролцогч компаниудын идэвх сайжирсан байна. Тухайлбал, “Энержи Ресурс” ХХК-ийн нэг удаад арилжих баяжуулсан коксжих нүүрсний хэмжээг 12,800-19,200 тонн болгон өсгөсөн. Мөн баяжуулсан дунд зэрэг үнстэй хагас хатуу коксжих нүүрс гэсэн төрлийг нэмжээ. Тус компани 19,200 тонн, 25,600 тонн гэсэн тогтмол жингээр нүүрсний арилжаанд оролцож байна. Түүнээс гадна өдөрт хоёр дуудлага худалдааны хуваарь зарлаж байсан бол тавдугаар сарын 22-нд гурван хуваарь зарлаж, амжилттай арилжлаа. 

“Эрдэнэс Тавантолгой” ХК тавдугаар сард эрчим хүчний нүүрс дотроо битумт, үл барьцалдах нүүрс гэсэн төрлийг нэмсэнээр биржийн арилжаанд хамгийн олон төрлийн бүтээгдэхүүнээр оролцож байна.  

Биржийн нүүрсний арилжаанд дөрвөн компани өнгөрсөн оноос тогтмол оролцож байгаа. Тэдэнд дээр “Монголын Алт (МАК)” 1/3 коксжих нүүрсээр тавдугаар сард нэгдлээ.  

Уул уурхайн бүтээгдэхүүний амжилттай арилжааны 41 хувийг гурван төрлийн төмрийн арилжаа эзэлж байна. Төмрийн 58 болон 52 хувийн хүдэр он гарснаас хойших төмрийн арилжааны 80 хувийг бүрдүүлжээ. 

Зэсийн баяжмалыг биржээр арилжаалах Засгийн газрын тогтоолын дагуу “Эрдэнэт Үйлдвэр” ТӨҮГ дөрөвдүгээр сарын 28-ны өдөр анхны арилжаанд оролцов. Тус үйлдвэр анхны арилжаагаар 22.35 хувийн агуулгатай 2,718 хуурай метр тонн (ХМТ) зэсийг 5.8 сая ам.доллароор борлуулсан байна. 

Нүүрсний хамгийн өндөр үнийн өсөлт хоёрдугаар сард бүртгэгдлээ. Арилжааны үеийн үнийн өсөлт нэгдүгээр сард 11.7 хувь, хоёрдугаар сард 14 хувь, гуравдугаар сард 8.4 хувь, дөрөвдүгээр сард 9.8 хувь, тавдугаар сард 8 хувьтай байлаа. Нүүрсний дуудлага арилжааны 1/3 нь тавдугаар сард хийгджээ.

Тавдугаар сарын 20-ноос хойш 58 болон 52 хувийн төмрийн хүдрийн арилжаа идэвхтэй явагдлаа. Нийт 26 арилжааны үнийн өсөлт дунджаар 11.2 хувь болж огцом өссөн юм. Төмрийн арилжааны үнийн өсөлт нэгдүгээр сард 1.7 хувь, хоёрдугаар сард 3.7 хувь, гуравдугаар сард 0.3 хувь,  дөрөвдүгээр сард 6.4 хувь, тавдугаар сард  дунжаар 8 хувьтай  байв. 

Оны эхний таван сарын нүүрсний арилжаа

Оны эхний таван сарын төмрийн арилжаа

Оны эхний таван сарын зэсийн арилжаа

Эх сурвалж: МХБ