Өнөөдөр (2025.04.04) “Өсөлттэй Өмнөговь-Хамтын ажиллагаа” зөвлөлдөх уулзалт 3 дахь жилдээ Улаанбаатар хотод боллоо. 2022 оноос хойш Өмнөговь аймгийн Засаг даргын тамгын газраас зохион байгуулж буй тус хуралд аймагт үйл ажиллагаа явуулдаг уул уурхайн компанийн төлөөллүүд, ханган нийлүүлэгчид, холбогдох албан тушаалтнууд оролцлоо.
“Өмнөговь аймгийн улсад төвлөрүүлдэг орлого сүүлийн дөрвөн жилийн хугацаанд 20 дахин өссөн. Ингэж өссөн шалтгаан нь аймагт үйл ажиллагаа явуулдаг 15 уул уурхайн компани, арилжааны банк, үүрэн холбоо, шатахуун түгээгч, гэрээгээр үйл ажиллагаа явуулдаг туслан гүйцэтгэгч компаниуд орлогоо зөв мэдүүлснээр ийм үр дүнд хүрсэн. 2022 оны нэгдүгээр сарын 1-нээс тухайн бүс нутгаас олсон орлогыг зөв мэдүүлсэн тохиолдолд орлогын 40 хувийг аймаг, сумын төсөвт эргүүлж шилжүүлдэг болсон. Ийм хэмжээний төсөв бүрдүүлж өгдөг аж ахуйн нэгж, компаниудад баярлалаа” хэмээн чуулганыг нээж Өмнөговь аймгийн Засаг дарга Н.Энхбат хэллээ.
Тэрээр үргэлжлүүлэн, “Гашуунсухайт-Ганцмод боомтын төмөр замын хил холболтын ажил эхэлнэ. Энэ хооронд Шивээхүрэнгийн 300 м-ийн төмөр замын холболт хийгдэнэ. Дараа нь Ханги-Мандал зэргээр холбогдож гарц, орцууд нэмэгдэнэ. Үүнийг аймаг, орон нутгийн зүгээс дэмжиж ажиллана. Удахгүй Өвөр Монголын Баяннуур, Алшай аймагтай хамтын ажиллагааны санамж бичиг зурна. Ингэснээр Өмнөговь аймгийн баруун, зүүн хил дээр нүүрсний экспортод хамтран ажиллах боломж бүрдэнэ” гэлээ.
2021 онд Өмнөговь аймаг улсын төсөвт төвлөрүүлсөн орлого 78.3 тэрбум төгрөг байсан. Тэгвэл энэхүү орлого 2025 онд 1.7 их наяд төгрөг болж өсөх дүр зурагтай байгааг Өмнөговь аймгийн Засаг даргын орлогч Ж.Занабазар илтгэлээ. Цаашид эдийн засгийг төрөлжүүлэхийн тулд аялал жуулчлалыг хөгжүүлэх гурван төсөлд 2.5 тэрбум төгрөгийг төсөвлөжээ.
Өмнөговь аймаг өнгөрсөн 20 жилийн хугацаанд орон нутгийн төсвөөс Монгол Улсын төсөвт төвлөрүүлсэн нийт орлого 2024 оны дүнгээр 5 их наяд орчим төгрөгт хүрснийг Төсвийн тогтвортой байдлын зөвлөлийн дарга, эдийн засагч Н.Энхбаяр хэллээ. Уул уурхай төвлөрсөн тус аймгийн хувьд хэвийн, тасалдалгүй үйл ажиллагаа явуулахын тулд тээвэрлэлтийн өртөг зардлыг бууруулах үүднээс сайн чанарын, хүнд даацын автозамыг байгуулж, эрчим хүчний найдвартай эх үүсвэр бүрдүүлэх шаардлагатай гэдгийг зөвлөлөө.
Монголбанкны ерөнхийлөгч Б.Лхагвасүрэн “2025 онд эдийн засгийн өсөлтийн төсөөлөлд уул уурхайн салбарын өсөлт 18.9 хувьд хүрнэ гэж тооцсон. Энэ онд Монгол Улсын эдийн засгийн өсөлт 7.6 хувьд байж зэсийн үйлдвэрлэл нэмэгдсэнээр уул уурхайн салбарыг тэтгэнэ. 2023 онд уул уурхайн салбар Өмнөговь аймгийн ДНБ-ий 61 хувийг бүрдүүлсэн” гэв.
Энэ удаагийн хуралд 6 уул уурхайн туслан гүйцэтгэгч, 340 гаруй төлөөлөл оролцож буйгаар онцлогтой. Тус хурлыг Улаанбаатар хотод хийх болсон шалтгаан нь Өмнөговь аймагт үйл ажиллагаа явуулдаг уул уурхайн компаниудын туслан гүйцэтгэгчдийн дийлэнх нь энд бүртгэлтэй байдаг. Тэдгээр аж ахуйн нэгжүүдийг орон нутагт татан төвлөрүүлэх зорилготой байна.
Энэхүү чуулганд анх удаа оролцож, өөрсдийн бүтээгдэхүүнийг дэлгэн тавьсан хувийн хэвшлийнхтэй уулзлаа. Ажлын хувцасны оёдлын үйлдвэрлэлийн “Ихэр Гурван Мөнх” ХХК-ийн Оёдолчин, дадлагажигч, Монгол Солонгосын политехникийн коллежийн 3-р түвшний оюутан Т.Бадамлянхуа хэлэхдээ, “Манай компани Өмнөговь аймгийн Ханбогд суманд үйл ажиллагаа явуулдаг. Бүх төрлийн ажлын хувцсыг хийж, Оюутолгой уурхайн ханган нийлүүлэгч компаниудтай хамтран ажилладаг. Өнөөдрийн үйл ажиллагаанд мастертайгаа хамт өөрсдийн үйл ажиллагааг танилцуулж, шинэ компаниудтай харилцаа үүсгэх зорилготой оролцож байна.” гэв.
Мод үржүүлгийн үйлдвэрлэл явуулдаг “Заг-Агро” ХХК-ийн Захирал Д.Загдрагчаа хэлэхдээ, “2018 оноос хойш Өмнөговь аймгийн Даланзадгад хотод хүлэмжийн аж ахуйн чиглэлээр үйл ажиллагаа явуулж байгаад сүүлийн 2-3 жилд мод үржүүлэг, байгалийн болон уул уурхайн нөхөн сэргээлтийн чиглэлээр үйл ажиллагаа явуулж байна. Анх удаа энэхүү үйл ажиллагаанд оролцож байна. Олон талын төлөөллүүдийг нэг дор цуглуулсан чухал хурал болж байна. Манайх энэ жил Сүхбаатар аймгаас ойжуулалт хийх санал тавьсан. Өмнө нь зөвхөн аймгийн хэмжээнд Гурвантэс, Баяндалай, Сэврэй, Цогтцэций сумдад ажиллаж байсан” гэв.
Хурлын үйл ажиллагаанд “Мандал санхүүгийн нэгдэл”-ийн ТУЗ-ийн дарга Ө.Ганзориг, “Монголын Хөрөнгийн Бирж” ХК-ийн Гүйцэтгэх захирлын үүргийг түр орлон гүйцэтгэгч Б.Дөлгөөн нар илтгэл тавилаа. 
