Нөөц нь тогтоогдсон 50 ордын төрийн эзэмшлийн хувь хэмжээг тогтооно

Б.БАЯНЖАВЗАН

Засгийн газрын ээлжит хуралдаанаас гарсан шийдвэрийг ЗГХЭГ-ын дарга Н.Учрал танилцууллаа. Тэрээр “Үндэсний баялгийн сангийн хуулийг хэрэгжүүлэх чиглэлээр авч байгаа арга хэмжээний талаар танилцуулга хийлээ. Үндэсний баялгийн сангийн хуулийг хэрэгжүүлэх, төрийн эзэмшлийн хувь хэмжээг стратегийн орд эзэмшиж байгаа компаниуд дээр тогтоох Ажлын хэсгийг шинэчилж байгуулсан.

2007 оны УИХ-ын тогтоолын дагуу стратегийн ордод хамаарч байгаа 16, нөөц нь тогтоогдсон 50 орчим ордын төрийн эзэмшлийн хувь хэмжээг тогтоож, иргэний хуримтлалын дансыг нэмэгдүүлэх ажлыг шат дараатайгаар зохион байгуулна. Ингэхдээ санхүүгийн болон хуулийн хөндлөнгийн шинжээч нар авч ажиллуулаад санхүүгийн модель дээр суурилж хийнэ. Байгалийн баялаг ашигласны төлбөр буюу АМНАТ-ыг төсөвт татаж авахгүй, иргэдийн хуримтлалын данс руу шууд шилждэг нөхцөлийг бүрдүүлж байна.

Мөн “Эрдэнэс Тавантолгой” ХК-ийн 2024 оны цэвэр ашгаас ногдол ашиг хуваарилах асуудлаар мэдээлэл солилцлоо. Хувьцаа эзэмшигчийн хувьд Компанийн хуулийн дагуу ногдол ашгийг хуваарилахдаа Цагаан сарын өмнө 100,000 төгрөг, дараагийн улиралд 100,000 төгрөгийн ногдол ашиг олгох нь зохимжтой гэж Засгийн газар үзэж байна. Иргэд “Эрдэнэс тавантолгой” ХК-ийн хувьцааны 27 орчим хувийн эзэмшдэг. Оны өмнө 1072 хувьцаа эзэмшиж буй иргэдэд ногдол ашгийн урьдчилгааг олгосон.

Хувьцааны ногдол ашгийг бэлэн мөнгөөр авах, хуримтлалын данс буюу хадгаламж руу хийх, болон нийслэлийн төсөл хөтөлбөр, төслүүдийг санхүүжүүлэхэд зарцуулах гэдэг сонголтоо E-Mongolia системээр хийнэ. УИХ-ын хаврын чуулганаар хуримтлалын дансанд хүү тооцох, хөрөнгийн зах зээл рүү орох бололцоог бүрдүүлж Баялгийн сангийн хуульд нэмэгт өөрчлөлт оруулахаар ажиллаж байна. Санал асуулгад оролцоогүй бол шууд таны дансанд хийнэ.” гэв.