Аж үйлдвэрийн салбарын борлуулалт 2025 оны эхний хоёр сард 7.1 их наяд төгрөгт хүрч, өмнөх оны мөн үеэс 971 тэрбум төгрөгөөр буурсан байна. Аж үйлдвэрийн салбарын бууралтад уул уурхай, олборлох салбар 20.1 хувиар голлон нөлөөлсөн гэж Үндэсний статистикийн хорооноос өнөөдөр (2025.03.18) мэдээллээ.
Уул уурхай, олборлох аж үйлдвэрийн салбарын борлуулсан бүтээгдэхүүн 2025 оны эхний хоёр сард 3.7 их наяд төгрөгт хүрсэн байна. Энэ нь өмнөх оны мөн үетэй харьцуулахад 1.3 их наяд төгрөгөөр буурсан.
Салбарын бууралтад чулуун болон хүрэн нүүрсний олборлолт 1.6 их наяд төгрөг, металлын хүдэр олборлолт 352 тэрбум төгрөг, газрын түүхий тос, байгалийн хийн олборлолт 27 тэрбум төгрөгөөр тус тус нөлөөлсөн байна. Харин бусад ашигт малтмалын олборлолт 18 тэрбум төгрөгөөр өсжээ.
2024 онд аж үйлдвэрийн салбарын борлуулалт 50.4 их наяд төгрөгт хүрсэн. Үүнээс уул уурхай, олборлох аж үйлдвэрийн салбарын борлуулалт 39.4 их наяд төгрөг буюу 78 хувийг эзэлж байсан юм.
