Өнөөдөр (2025.04.02) Засгийн газрын ээлжит хуралдаанаас гаргасан шийдвэрийг ЗГХЭГ-ын дарга Н.Учрал танилцууллаа.
Тэрээр хэлэхдээ, "39 стратегийн ордыг 18 жил мартагнуулсан. УИХ 2007 онд оруулж ирэхийг шийдчихээд байхад 18 жил эс үйлдэхүй хийсэн. УИХ-д оруулаагүй учраас аль нь ч стратегийн ордод тооцогдох шийдвэр гараагүй. Гэтэл эдгээр орд ДНБ-ний 5-аас дээших хувийн бүтээгдэхүүн үйлдвэрлэдэг. Улсын төсвөөр нөөц тогтоогдсон ордууд энд байгаа. 18 жилийн хугацаанд гадаад, дотоодын олон компаниуд санхүүгийн схем үүсгэж арилжаалсан. Баялгийг эздээс нь асуулгүй үрэн таран хийсэн нь тогтоогдсон учир даруй УИХ-ын тогтоолыг боловсруулж, өргөн мэдүүлж, 39 ордоо стратегийн орд гэж тооцож авах нь эхний алхам гэж үзэж байна.
Төгрөг нуурын орд стратегийн 39 ордын нэгд хамаардаг. Төгрөг нуурын ордыг 1983 оноос хойш хайгуул хийж, нөөцийг тогтоосон. Ер нь 3.5 тэрбум тонн нөөц байна гэдэг судалгаа гарсан байдаг. Үүн дээр олон компани хайгуул хийж, нөөцийг тодорхойлж ирсэн. Миний УИХ-ын чуулган дээр ярьдаг асуудал үнэн. Үүн дээр Төгрөг Энержи дөрвөн лиценз эзэмшдэг. Хүмүүст буруу ташаа ойлголт өгч байх шиг байна. Би УИХ-ын гишүүн Монгол Улсын төрийн тэргүүнээр ажиллаж байсан Х.Баттулгад хандаж хэлье. Та стратегийн ордод хамаардаг Төгрөг нуурыг зарсан нь үнэн.
Дээрээс нь та бол Монгол Улсын ерөнхийлөгчөөр ажиллаж байсан нь үнэн. Баялгийг иргэддээ өгье. Байгалийн баялагтаа эзэн болъё гэж ярьж яваа нь үнэн. Тиймээс би Баялгийн сангийн хуулийн Ажлын хэсгийн ахлагчийн хувиар та өөрийн хутгасан энэ асуудлыг нэг талд нь гаргаж, энэ олон компаниудтайгаа өөрөө учир холбогдлоо олж, асуудлаа шийд гэж 7 хоногийн хугацаа өгч байна. Үүнийг шийдэж чадахгүй бол Засгийн газар, бид хуулийн хүрээнд дараагийн арга хэмжээг авна гэдгийг хэлье" гэв.
