Mining Insight сэтгүүлийн редакц 2023 онд анх “Women CEO’s in Mining” төслийг санаачилсан билээ. Тус төслийг 2025 оноос Монголын Уул Уурхайн Үндэсний Ассоциаци дэмжин ажиллахаар болсон бөгөөд төслийг уул уурхайн салбарын эмэгтэй удирдагчдад танилцуулах үйл ажиллагаа ”Уул уурхайн 7 хоног” арга хэмжээний хүрээнд (2025.09.12) боллоо.
Арга хэмжээг нээж төслийн санаачлагч Mining Insight Magazine сэтгүүлийн Ерөнхий эрхлэгч Н.Ариунтуяа, төслийн дэмжигч Монголын Уул Уурхайн Үндэсний Ассоциацийн Гүйцэтгэх захирал Г.Эрдэнэтуяа нар үг хэлэв.
Эмэгтэй захирлуудын уулзалтад өдгөө уул уурхайн компаниудын удирдлагын түвшинд ажиллаж буй 16 захирал эмэгтэйгээс 10 нь хүрэлцэн ирсэн юм. "МоЭнКо" ХХК-ийн Дэд захирал Ж.Оюунчимэг, "Шувуун Хар Уул” ХХК-ийн Гүйцэтгэх захирал Г.Золбаяр, Монголын Уул Уурхайн Үндэсний Ассоциацийн Гүйцэтгэх захирал Г.Эрдэнэтуяа, "Эрдэнэжас” ХХК-ийн Гүйцэтгэх захирал З.Гантболор, “Эрч Майнинг” ХХК-ийн Гүйцэтгэх захирал Ч.Усанболор, "Монполимет" группийн Гүйцэтгэх захирал Б.Дэлгэр, "Монгол нүүрс” ассоциац"-ийн Удирдах зөвлөлийн дарга О.Оюумаа, "Эрдэнэс Оюутолгой" ХХК-ийн Гүйцэтгэх захирал Э.Ганхүү, “МНРИК” ХХК-ийн Гүйцэтгэх захирал А.Цолмон, "Бадрах Энержи" ХХК-ийн Ерөнхий захирал Корали Прийн нар уулзалтад оролцож, нүүр тулан танилцсаны зэрэгцээ санал бодлоо нээлттэй ярилцлаа.
Мөн сэтгүүлийн Бодлогын зөвлөлийг төлөөлж, Монголын чухал ашигт малтмалын ассоциацын ерөнхийлөгч М.Дагва, "Азийн батерей минералс" ХК-ийн Гүйцэтгэх захирал З.Ган-Очир нар оролцов.
“Women CEO’s in Mining” нь уул уурхайн салбар дахь эмэгтэй захирлуудын намтар, бизнесийн замналыг олон нийтэд сурталчлан таниулах замаар нийгэмд хэвшсэн ойлголтыг өөрчилж, жендэрийн тэгш байдлыг дэмжих зорилготой цуврал хөрөг нийтлэл бүхий сэтгүүл зүйн контент бүтээж буй төсөл болно.
Түүнчлэн уул уурхайн салбарт нийгмийн тэгш байдал, хариуцлагатай бизнесийн үнэт зүйлсийг түгээн дэлгэрүүлэх чиглэлд хамтарсан төсөл хөтөлбөр хэрэгжүүлж ажиллах юм.
