Монгол Улсын Ерөнхий сайдын 68 дугаар захирамжаар байгуулагдсан Оюутолгой төслийн менежментийн төлбөрийн хувь хэмжээг бууруулах үүрэг бүхий Ажлын хэсэг хөрөнгө оруулагч тал “Рио Тинто”-той хийж буй хэлэлцээ эхэллээ. Хэлэлцээ Аж үйлдвэр, эрдэс баялгийн яамны хурлын зааланд болж байна.
Монголын талаас Ажлын хэсгийг ахалж буй АҮЭБ-ийн сайд Г.Дамдиннямын зүгээс хөрөнгө оруулагч тал “Рио Тинто”-той хийж буй менежментийн төлбөрийг бууруулах, олон улсын жишигт хүргэх хэлэлцээг үр дүнд хүргэнэ гэсэн байр суурийг илэрхийлжээ.
Тэрээр “Рио Тинто”-той хийж буй өнөөдрийн хэлэлцээ бидний дөрөв дэх уулзалт болж байна. Ажлын хэсгээс хамгийн сүүлд захидалдаа нэлээн хатуу шаардлага тавьсан. Асуудлыг шуурхай шийдвэрлэхгүй бол дараагийн хэлэлцээ байхгүй гэсэн зарчмын шаардлага тавьж байна. Монголын тал хэлэлцээг аль болох хурдан хугацаанд шийдвэрлэх байр суурьтай байна. Хөрөнгө оруулагч талаас дөрвөн удаагийн уулзалтад Монгол Улсын Засгийн газраас надад өгсөн үүрэг даалгаврыг биелүүлэх хэмжээнд хариу өгөөгүй учир зөвшөөрөөгүй. Монгол Улсын Ерөнхий сайд асан Г.Занданшатар, Ерөнхий сайд Н.Учрал нарын байр суурь ижил. Монгол Улсын Засгийн газрын байр суурь өөрчлөгдөөгүй” гэжээ.
